Бүгүн, 5-июнь күнү Кызыл-Кыя шаарынын мэри А.Маткалыков жана баш имам хатиб Н.Топчиевдер ажылыкка аттана турган жарандар менен жолугушуп, зыяратчыларга жакшы каалоо-тилектерин айтышты.
Болочок ажылар менен жолугуп жатып шаар башчысы А.Маткалыков зыяратчыларга ак жол каалап, аман-эсен барып келиштерин тилеп, Кыргыз Республикасынын Президентинин №54 Жарлыгы менен тааныштырып, ысырапкерчиликтин алдын алуу жана болтурбоо боюнча маалымат берди.
Жолугушууда шаардын баш имаи-хатиби ажылыктын исламдагы орду, ажылык ибадатты так аткаруу, ажы башчыларга баш ийүү, сабырдуулук жана эл ичиндеги биримдик, бири-бирин сыйлоо, бири-бирине кызмат кылуу боюнча түшүндүрүү иштерин жүргүздү. Ошондой эле сапар учурунда Сауд Араб Падышачылыгынын тиешелүү мыйзамдарына баш ийип, САПтын ажылык министрлигинин талаптарын аткаруу керектигин баса белгиледи.
Эскерте кетсек, 31-майда биринчи каттам Ош – Медина багыты боюнча башталган. Кыргызстандан ажылыкка аттанган зыяратчылардын алгачкы реиси нурдуу Медина жана Жидда шаарына жасалып, алдыңкы топтор мейманканаларга жайгаштырылган. 31-майдан 8-июнга чейин Ош – Медина жана Ош-Жидда багыттары боюнча 4018 жаран учуп кетмекчи. Ал эми Бишкек шаарынан алгачкы каттам 6-июнда башталып, 10-июнга чейин уланат. Жалпысы болуп 2042 жаран Бишкек – Медина, Бишкек – Жидда багыттары боюнча жөнөп кетишмекчи. Быйылкы жылы 6060 жаран өздөрүнүн ажылык ибадаттарын аткаруу үчүн Сауд Араб Падышалыгына жөнөп жатышат. Ажылыктын нарктамасы 3750 АКШ долларын түзгөн.
