Кыргыз Республикасынын Транспорт жана коммуникациялар министринин 1-орун басары Талантбек Солтобаев, Баткен районунун акими Учкунбек Жоробаев, жол чарба департаментинин Баткен аймактык №7 бөлүмүнүн башчысы Икрам Акматов, Баткен токой чарбасынын башчысы Бактияр Козубаев, райондук ички иштер бөлүмүнүн башчысы милициянын полковниги Алмазбек Шагамурзаев, Кыштут айыл өкмөтүнүн башчысы Аширали Эркебаевдер Баткен районундагы Айгүл-Тоо, Айгүл Таш – Согмент автожолунун жана Таян-Сай жолунун абалдарын жеринде барып, кабар алып келишти. Бул тууралуу Баткен районунун мамлекеттик администрациясынын басма сөз кызматы билидирди.
Жыйынтыгында Айгүл-Тоо коругун өнүктүрүү, коргоо жана туристтердин келүүсүнө шарт түзүү үчүн Айгүл-Таш тоосуна баруучу жолду жана автоунаалар токтоочу жай үчүн каралган жер аянтчасын асфальттоо, Кыштут айыл өкмөтүнүн аймагындагы жалпы узундугу 12 чакырымды түзгөн Таян-Сай автожолун куруу жагы Кыргыз Республикасынын Транспорт жана коммуникациялар министрлигинин жардамы менен ишке ашуусу мерчемделүүдө.
Белгилей кетсек буга чейин Айгүл-Тоого баруучу жол жана Таян-Сай автожолунун топосьемка жумуштары жасалып, райондук деңгээлде жолго тиешелүү болгон документ иштери жүргүзүлүп жаткан.
Буюрса аталган автожолдор курулуп бүткөрүлсө, Айгүл-Тоого келген туристтердин саны арбып, айыл тургундарына жакшы шарттар түзүлөт.
Сай айылына көз карандысыз жол ачылып, элдин каттамы
жакшы жолго коюлат. Таян-Сай жолунун курулушу бүтүшү менен Баткен, Лейлек райондорунун, Кадамжай районунун Айдаркен шаары Бирлик айыл өкмөтүнүн тургундары тоскоолдуксуз каттамда каттап калышат.
